As obras de estabilización da estrutura do antigo túnel ferroviario da liña Ponferrada-Villablino, no encoro de Bárcena (O Bierzo), xa están rematadas. Extraco, responsable dos traballos, fixo entrega das mesmas á Confederación Hidrográfica do Miño Sil.

O túnel en cuestión formaba parte da antiga liña de ferrocarril que unía as localidades de Ponferrada e Villablino, e que foi modificada nos anos 60 pola construción do encoro, no curso do río Sil. Actualmente, a estrutura atópase mergullada parte do ano e emprégase para a captación de auga do encoro para o abastecemento aos regadíos de Cubillos del Sil.

Os traballos desenvoltos por Extraco incluíron a demolición parcial do túnel, a construción de noiros na zona máis próxima ao encoro, mellorando as instalacións de valvulería e captación; a estabilización do conxunto con revestimento interno da estrutura con novos armados, o ‘gunitado’ das superficies, e a colocación de cimbras de sostemento con chapa Bernold. As tarefas complementáronse con novas drenaxes californianas ao longo de todo o túnel, a execución de novas soleiras con cuneta interior e melloras na iluminación.