Os traballos de construción do Centro de Cumprimento Basilio Lakas en María Chiquita, na provincia panameña de Colón, que executa Extraco en consorcio con Lakas e Domar, avanzan a bo ritmo. A ministra de Goberno María Luisa Romero visitou días atrás as instalacións, acompañada polo bispo da Diócese de Colón e Kuna Yala, Monseñor Manuel Ochogavía, para comprobar o desenvolvemento das obras.

Este centro de menores terá capacidade para albergar a 72 mozos e contará con tres pavillóns de aloxamento ou dormitorios, escola, garita de control, clínica, cociña e comedor, cancha para múltiples usos e de fútbol, capela relixiosa e torres de vixilancia.

Ademais da construción, o consorcio de empresas encargouse da redacción do proxecto, a xestión da aprobación municipal e o estudo de impacto ambiental.

Dende o propio Goberno explicaron que a construción deste moderno centro busca establecer unha infraestrutura apta para que os adolescentes poidan continuar os seus estudos e aprender novas disciplinas, que lles axuden a reinserirse na sociedade.