Baixo o título de “Ourense Deslumbra”, Extraco acaba de editar un libro que describe, enxalza e exhibe os moitos valores naturais, arquitectónicos, etnográficos e históricos da provincia de Ourense.

A través de textos de Carlos Núñez Deza e de imaxes cedidas polo Inorde e de varios fotógrafos profesionais (José Luis Filpo, Carlos Núñez Deza, Luis Miguel Bugallo Sánchez e José Antonio Gil Martínez), a publicación repasa ao longo de 66 páxinas os encantos das comarcas de Ourense nun impoñente percorrido visual.

O libro ten espazo para a Ribeira Sacra, cos Canóns do Sil, os mosteiros ou o seu viño como grandes tesouros; a capital, coas súas termas ou o casco histórico como emblemas; Allariz e o Alto Arnoia, como gran xoia histórica e patrimonial; Celanova e a Serra do Xurés, coa súa biodiversidade e riqueza paisaxística; O Ribeiro e O Carballiño, mestura de enoloxía e patrimonio histórico; Valdeorras, cos seus contrastes naturais e a súa tradición vinícola; o Oriente Ourensán, coa fascinación das súas montañas e vales, e a Vía da Prata, a antiga ruta romana.