O programa de divulgación científica “La Aventura del Saber” de La 2 de TVE, dedicou o seu espacio “La Universidad responde” do pasado 18 de xuño á utilización de cunchas de mexillón como material para edificación. Nesta edición do programa explicáronse as experiencias derivadas do proxecto de I+D “BIOVALVO: Valorización das cunchas de bivalvos galegas no ámbito da construción”, liderado por EXTRACO, que contou coa participación do Grupo de Construción (gCONS), da E.T.S. de Enxeñeiros de Camiños, Canais de Portos da Coruña como centro de investigación asociado. O proxecto foi cofinanciado polo “Centro para el Desarrollo Tecnológico e Industrial (CDTI)”, organismo dependente do Ministerio de Ciencia e Innovación (Ref. ITC-20133094).

Dentro das actividades do proxecto, construíuse un módulo experimental situado no Campus de Elviña, da Universidade da Coruña (UDC), empregando 20 toneladas de cunchas de mexillón. Os profesores Belén González Fonteboa e Fernando Martínez Abella, investigadores principais, explicaron no programa cómo se deseñou o edificio e foi acometida a execución da cimentación, os cerramentos, revestimentos e os seus acabados.

As especiais características do proxecto construtivo, deseñado en colaboración co arquitecto Mike Lehmhaus (do Estudo Casadobe), fixérono finalista do III Concurso Iberoamericano Passivhaus (CIPH 2015).

Entre os resultados de BIOVALVO destacan, ademais do propio módulo experimental, as patentes que EXTRACO comparte desde 2018 coa UDC, relativas a  un sistema construtivo de illamento a base de cunchas de mexillón e novos tipos de morteiros e formigóns, que utilizan áridos de cascas e que presentan un acabado especial (Patentes con número de publicación 2647976 e 2647977 no “Boletín Oficial da Propiedade Industrial”, respectivamente).

Na actualidade, o módulo experimental de BIOVALVO forma parte do equipamento docente da UDC. Pode accederse a máis información sobre o emblemático edificio nos enlaces: http://biovalvo.blogspot.com/ e https://www.rtve.es/alacarta/videos/la-aventura-del-saber/aventura-del-saber-18-06-20/5600769/?t=18m43s