A construtora Extraco contratará un técnico especializado e un xefe de administración para desenvolver novas obras en Centroamérica, concretamente en Panamá.

O perfil de técnico especializado para o que se oferta emprego é o de enxeñeiro de camiños, canais e portos, con ampla experiencia demostrada na edificación, ou arquitecto técnico. Necesítase que teña coñecemento do mercado latinoamericano e valorarase a experiencia previa no estranxeiro (especialmente Centro e Sudamérica) e a traxectoria profesional.

Para optar ao posto de xefe de administración requírense estudos universitarios no eido económico-empresarial e coñecementos de informática. Para ambos casos precísase dispoñibilidade xeográfica para residir indefinidamente na zona.

As persoas interesadas poden enviar o seu currículo vitae á dirección rrhh@extraco.es, indicando no asunto CV PARA PANAMÁ.

A empresa comezou a finais do pasado ano a súa actividade neste país cunhas actuacións de accesibilidade no distrito de San Miguelito na capital panameña, enmarcadas nun proxecto da Secretaría Nacional de Persoas con Discapacidade. Actualmente ten outros proxectos en marcha, ligados ao ámbito da edificación.