Estudantes do Grao de Enxeñería Civil da Universidade de Santiago de Compostela (USC) realizaron o pasado mes de xuño unha visita de carácter técnico á Autovía Ourense-Celanova (AG-31). No transcurso da xornada visitaron a sala de control de tráfico do Centro de Conservación e Explotación situado nas inmediacións do enlace centro da autovía, en A Manchica (A Merca, Ourense).

Ademais do sistema de pantallas desde o que se controla o tráfico da estrada en tempo real, o persoal técnico de EXTRACO explicou aos estudantes os diferentes sistemas de seguridade da infraestrutura para evitar circulacións indebidas ou a intrusión de animais, entre outras incidencias, así como os elementos para a contabilización dos vehículos que pasan pola vía diariamente, xa que a súa explotación realízase na modalidade de “peaxe en sombra”.

Os estudantes coñeceron tamén os medios e instalacións destinados a garantir a circulación en inverno (depósitos de sal, salmoiras e equipos quitaneves para operacións de “vialidade invernal”), desprazándose posteriormente á planta de fabricación de aglomerado asfáltico que EXTRACO ten no Polígono Industrial de Chorente, en Allariz, na que completaron a xornada.

Esta actividade enmárcase na política de Responsabilidade Social Empresarial (RSE) de EXTRACO, que apoia de maneira habitual a diferentes institucións académicas galegas de educación superior, a través de accións formativas, de patrocinio e proxectos de I+D+i.

A Autovía Ourense-Celanova (AG-31) é unha vía autonómica de alta capacidade, de máis de 20 km de lonxitude, que enlaza a Autovía das Rías Baixas-A-52 coa localidade de Celanova (Ourense). Inaugurada en 2013 para dar servizo a unha área de influencia de máis de 130.000 persoas, e deseñada cuns elevados estándares de seguridade e confort, foi construída coa participación de EXTRACO e é explotada pola sociedade concesionaria AUCEL, S.A., da que tamén forma parte EXTRACO.